吸血蠓

香港唔止人多、車多、樓多，仲有蚊多。如果閣下住喺蚊患重災區，就會發覺自己唔止置身石屎森林，簡直就好似置身蠻荒時代嘅原始森林，飛蚊襲人嘅血腥場面恐怖到嚇死你。

吸血蠓

本來呢，食環署專責滅蚊，如果佢哋捉蚊好似捉小販咁勇猛，市民就唔使日日與蚊共舞咁煩惱。可惜吖，港產官僚唔知係咪患有施政飛蚊症，滅蚊工作求求其其，好似盲佬耍拳亂咁嚟，簡直害街坊，叮！

吸血蠓

當局滅蚊點樣求求其其呢？嗱，食環署咪一直以各區誘蚊產卵器指數作為加強滅蚊工作指標嘅，最新數字顯示，馬鞍山嘅指數只有百分之一點七，屬指數最低級別，理論上係咪蚊蹤絕迹呀？如果你咁諗，就真係太傻太天真嘞。

吸血蠓

本報記者進行人肉測試，坐喺公園短短三十分鐘，結果被吸血鬼圍攻狂咬，手腳被叮到紅紅腫腫，痕癢難當。之後記者仲發現手臂有多粒小如芝麻嘅吸血蠓，被咬傷口更加腫大起來，兩日後至消退。

喂，馬鞍山明明誘蚊產卵器指數極低，點解飛蚊軍團會龐大成咁？咪係港產官僚失職害人囉，原來，部分新落成屋邨根本無放置俗稱蚊杯嘅誘蚊產卵器，好似馬鞍山碩門邨咁，入伙三年都無擺蚊杯，所謂指數根本係自欺欺人，完全反映唔到真實情況。

吸血蠓

港產官僚靠蚊杯指數決定滅蚊工作力度，家陣望住離題萬丈嘅蚊杯數據，以為惡蚊冇卵用，其實係自己冇鬼用，搞到指數嚴重失準，滅蚊嚴重失敗，簡直靠害，叮！

仲有吖，食環署滅蚊不力，除咗因為疏懶失職，冇放置蚊杯令指數失準之外，仲因為敷衍塞責，被漏網之蚊逍遙「法」外。原來，蚊杯指數只係監察白紋伊蚊嘅分布，但係吸血蠓就無被列入監察範圍之內，唔怪得香港嘅吸血鬼咁猖獗啦。

正如專家話齋，吸血蠓嘅殺傷力比蚊更強，隨時叮到市民體無完膚，甚至傷口嚴重發炎，唔講得笑o架。唔該港產官僚快快醫治施政飛蚊症，堵塞滅蚊漏洞。

吸血蠓

叮你個鎯鎯，蚊患係傳播日本腦炎嘅元兇，一旦爆發疫症，就死得人多。港產官僚滅蚊求求其其，得過且過，咁算點呀？唔通真係針唔拮到肉唔知痛？咁啦，計太一叮話齋，如果當局再係敷衍塞責，大家不妨捉港產官僚去餵蚊，等佢哋咁逍遙快活吖喇，叮！

吸血蠓